आध्यात्मिक सभा (#11195)

*जब तिमीहरू सभा कक्षमा प्रवेश गर्दछौ, ईश्वर प्रेमले धड्केको हृदय र उनको सम्झनाबाहेक अन्य सबै कुराबाट पवित्र राखिएको जिह्वाले यो प्रार्थना पाठ गर, ताकि सर्व– शक्तिमान्ले तिमीलाई कृपापूर्वक परम विजय हासिल गर्न सहायता गर्नेछन् । 

हे ईश्वर, मेरा ईश्वर ! हामी तिम्रा सेवकहरू हौं जो भक्तिका साथ तिम्रो पवित्र मुहारतर्फ अभिमखु छौं, जो यस गौरवमय युगमा तिमीबाहेक अन्य सबैबाट विमुख भएका छौं । हामी राय र विचारमा एकमत भएर, मानव–जातिका बीच तिम्रो वचनको प्रशंसा गर्न हाम्रा उद्देश्यहरूलाई समन्वित गराएर यस आध्यात्मिक सभामा एकत्र भएका छौं। हे प्रभु, हाम्रा ईश्वर ! हामीलाई तिम्रा दैवी मार्गदर्शनका चिन्ह, मानिसहरूका बीच तिम्रो उत्कृष्ट धर्मका ध्वजा, तिम्रो शक्तिशाली संविदाको सेवक बनाइदेऊ, हे तिमी हाम्रा सर्वोच्च प्रभु ! तिम्रो आभा अधिराज्यमा हामीलाई तिम्रो दैवी एकताको चिन्ह, सबै क्षेत्रहरूमा चम्कने देदीप्यमान ताराहरू बनाइदेऊ । प्रभु ! हामीलाई तिम्रा अनुपम कृपाको लहरले प्रवाहित समुद्र, तिम्रा सर्व–गौरवमय उचाइबाट बगिरहेका खोलाहरू, तिम्रा स्वर्गीय धर्मका वृक्षका स्वच्छ फलहरू, तिम्रा दिव्यबागमा तिम्रो कृपाको समीरद्वारा हल्लिरहेका वृक्ष बन्न सहायता गर । हे ईश्वर ! हाम्रो आत्मालाई तिम्रो दैवी एकताका श्लोकहरूमा आश्रित गराइदेऊ, हाम्रो हृदयलाई तिम्रो कृपाको बाढीले प्रफुल्लित पारिदेऊ, ताकि हामी एउटै समुद्रका लहरहरू सरह एक हुन सकांै र तिम्रा उज्ज्वल प्रकाशका किरणहरू सरह मिल्न सकौं ; ताकि हामा्र विचार, हाम्रा राय, हाम्रा भावनाहरू विश्वभरि एकताका भावना प्रदर्शित गर्दै एउटै यथार्थ सरह बन्न सकून् । 

तिमी नै दयालु, उदार, दानी, सर्व–शक्तिमान्, कृपालु तथा करुणामय छौ ।

-`Abdu'l-Bahá
-----------------------

आध्यात्मिक सभा (#11196)

हे तिमी दयालु ईश्वर ! हामी सबै यो आध्यात्मिक सभामा बडो नम्रतापूर्वक एकत्रित भएका छौं । हामीले आफ्नो अनुहार तिम्रो साम्राज्यतर्फ अभिमुख गरेका छौं, र तिम्रो मान्यता एवं सहायताको याचना गरिरहेका छौं, ताकि हामी सबै एक हनु सकौं अनि आपस्तमा एक अर्काको साथ दूध र महको मिठासझैं मिल्न सकौं तथा समस्त मानव– जातिको एकताको कारण बन्न सकौं । हे भगवान् ! हामीलाई पवित्र हृदय तथा प्रकाशमान् अन्तःकरण प्रदान गर, जसद्वारा हामी तिमीसँगै प्रार्थना गर्न र हाम्रा आकांक्षाहरू पूरा गर्न याचना गर्दछौं । 

हे सर्व–शक्तिमान् ! हाम्रा पापहरू माथि ध्यान नदेऊ, बरू हामीमाथि आफ्नो परम दयादृष्टि राख । हाम्रा गल्तीहरूलाई माफ गर । हामी माथि आफ्नो परम–कृपाको वृष्टि गर । आफ्नो परम पवित्र प्रेमको अग्नि प्रदीप्त गरिदऊे, अन्धविश्वास, लालसा एवं कामनाको आवरणलाई डढाएर खरानी बनाइदेऊ । हामीलाई स्वार्थको कमजोरीहरूबाट रक्षा गर । तिम्रो परम दयालुताको वृक्षको छायाँमुनि हामीलाई आश्रय प्रदान गर अनि हामीलाई आध्यात्मिक सुख एवं आनन्द देऊ । 

निःसंशय, तिमी सर्व–शक्तिमान् तथा महाबलवान् छौ ।

-`Abdu'l-Bahá
-----------------------

आध्यात्मिक सभा (#11197)

*आध्यात्मिक सभाको विसर्जन समयमा गरिने प्रार्थना । 

हे प्रभु ! हे परमेश्वर ! आफ्नो एकताको अदृश्य साम्राज्यबाट तिमी हामीलाई हेरिरहेका छौ अनि देखिरहेका छौ कि तिमीमा विश्वास गरेर, तिम्रा चिन्हहरूप्रति आस्थावान् भएर, तिम्रा संविदा र प्रमाणप्रति दृढ विश्वास राखेर, तिमीतिर आकृष्ट भएर, तिम्रो प्रेमको अग्निबाट प्रदीप्त भएर, तिम्रो धर्मप्रति सत्यनिष्ठ भएर तिम्रो उद्यानका सेवकहरू बनेर, तिम्रो धर्मको प्रचारक बनेर, तिम्रो उपासक बनेर, तिमीप्रति विनम्र भएर, तिम्रो संघारमा आफैलाई समर्पित गरेर तथा तिम्रा चुनिएका भक्तहरूको सेवा गर्नमा हामीलाई स्वीकार गर्ने चाहना गर्दै हामी यस आध्यात्मिक सभामा भेला भएका छौं । आफ्ना अदुश्य गणद्वारा हाम्रो सहायता गर, हामीलाई तिम्रो सेवा गर्ने सामथ्र्य प्रदान गर र हामीलाई तिम्रो सधैँ विनम्र भई तिम्रो आराधना गर्ने र तिमीसित सम्पर्क राख्ने सेवकहरू बनाइदेऊ । 

हे हाम्रा मालिक ! हामी निबर्ल छौं तर तिमी बलवान् तथा शक्तिशाली छौ । हामी मृत छौं, तिमी जीवनदायिनी परमब्रह्मा हौ । हामी अभावग्रस्त छौं, तिमी शक्तिशाली तथा पालनहारा छौ । 

हे हाम्रा मालिक ! हामीलाई तिम्रो दिव्य धामतिर उन्मुख गराऊ; तिम्रो स्वर्गीय कृपाद्वारा आफ्नो दिव्य थालबाट हाम्रो भरणपोष्ण गर, तिम्रो सर्वोच्च देव गणद्वारा हामीलाई सहायता गर र आभा अधिराज्यका पवित्रात्माहरूद्वारा हामीलाई दीक्षित गराऊ । 

निश्चय नै, तिमी दाता तथा कृपालु हौ । तिमी महान् ढुकुटीका मालिक हौ र निश्चय नै तिमी क्षमाशील र कृपानिधान हौ ।

-`Abdu'l-Bahá
-----------------------

